Brotnir hlekkir

Frá meistara spennu og drama, Ken Follett, kemur Brotnir hlekkir, bók sem á sér stað á umbrotatímum, bæði í Bretlandi og Bandaríkjunum.

Mack McAsh fæðist inn í fátækt og þrældóm í Skotlandi árið 1767. Hann berst af hugrekki gegn óréttlæti aðstæðna sinna, en fær í staðinn aðeins dóm sem landráðamaður. Lizzie Hallim elst upp í gjörólíku umhverfi, en er á sinn hátt alveg jafn mikið fórnarlamb. Hún er af efnuðum ættum og trúlofuð erfingja mikilla auðæfa, manni sem hún hefur engan áhuga á.

Saman tekst Lizzie og Mack að flýja hlutskipti sín, en það er ekki fyrr en komið er yfir Atlantshafið sem þeim tekst endanlega að brjóta hlekki sína og finna hið sanna frelsi.

Brotnir hlekkir kom fyrst út árið 1995 og hefur selst í yfir 8,6 milljón eintökum um allan heim.

Ken Follett er breskur metsöluhöfundur. Af þeim 37 titlum sem hann hefur ritað hafa selst yfir 195 milljón eintök á 40 tungumálum í fleiri en 80 löndum. Hann fæddist í Cardiff í Wales árið 1949 og lærði heimspeki á sínum yngri árum áður en hann fór að starfa sem blaðamaður. Árið 1978 skaust hann upp á stjörnuhimininn með bók sinni Nálarauga (Eye of the Needle). Hann hefur ritað mikið af sögulegum skáldsögum, en ein sú vinsælasta er bókin Pillars of the Earth, sem var gerð að sjónvarpsþáttaröð árið 2010. Ken dáir tónlist næstum jafn mikið og bækur og spilar gjarnan á bassagítar. Hann býr í Herefordshire í Englandi með konu sinni Barböru, en þau eiga saman fimm börn, sex barnabörn og þrjá labradora. Hann er virkur í ýmiss konar góðgerðastarfsemi og var formaður Dyslexia Action í áratug.