Twain – författare

Hér er að finna samantekt fjögurra sígildra skáldsagna sem enginn ætti að láta framhjá sér fara. Fyrst er að nefna nefna söguna af Tuma litla eftir Mark Twain sem höfðar til lesenda á öllum aldri. Hrifnæm frásögn af ráðagóðum dreng og kostulegum uppátækjum hans.

Bækurnar Umhverfis jörðina á áttatíu dögum eftir Jules Verne og Róbinson Krúsó eftir Daniel Defoe opna heim stórfenglegra ævintýra sem fylgir fallegur boðskapur. Síðast en ekki síst geta lesendur unað sér við lestur hins stórbrotna harmleiks, Hamlet, eftir William Shakespeare.

Höfundar bókanna í samantekt þessari eru Mark Twain, William Shakespeare, Daniel Defoe og Jules Verne.

Sagan segir af hinum unga Henry Adams sem lendir í afdrifaríkum óförum í bátsferð að kvöldlagi. Blessunarlega er honum bjargað af ensku briggskipi og tekur þá við löng og ströng sigling. Þegar skipið kemur loks að landi í Lundúnarborg er Henry bæði auralaus og ráðþrota. Gerist þá hið óvænta og daginn eftir er hann kallaður á fund auðugra bræðra sem vilja lána honum peningaseðil að virði milljón dollara. Með seðilinn í vasanum tekur líf Henrys stakkaskiptum og nú reynir verulega á skynsemi hans og heiðarleika.

Samuel Langhorne Clemens (1835-1910), betur þekktur sem Mark Twain, var bandarískur rithöfundur. Framan af starfaði Twain við prentiðn en hóf síðar störf sem blaðamaður. Þar fann hann ástríðu sína og vakti fljótt athygli fyrir einstaka ritfærni og kímnigáfu. Ásamt því að skrifa fjölmargar skáldsögur, smásögur og blaðagreinar skapaði Twain sér einnig gott orðspor sem ferðabókahöfundur og fyrirlesari. Þekktustu skáldverk hans eru Sagan af Tuma litla og Stikilsberja-Finnur. Twain er talinn með áhrifamestu rithöfundum amerískra bókmennta.